موقف

شيلتها وروحت بيها.. كنا ف نص الليل حمدت ربنا ان مافيش حد شايفنا.

بس لما طلعت بيها فوق ملقتش ولا دكتور رضي يطلع معايا، مروحتش المستشفى لانهم طبيعي كانوا هيسألوا ايه اللي حصل وهدخل في سين وجيم، تاني يوم جبت دكتور من شارع بعيد عننا بكتير، لما شافها قالي:

_لازم تروح مستشفى ضروري هناك هيعملوا الواجب .. ده عضمها متكسر خالص؟!!.

لما روحت لكتير من سكان الحارة كلهم رفضوا يساعدوني، كأني فيرس والكل بيبعدوا عني احسن اعديهم، غير الكلام الوحش اللي سمعته في حق اختي، مكنتش عارف اتصرف ازاي، روحت بيها للمستشفى وهناك اتحجزت بعد ما لقوا ان معظم عضم رجليها مكسور، سألوني عن السبب مرضتش اتكلم وقولت وقعت من على السلم، مصدقونيش بس فضلت اتحايل عليهم يشوفوها الاول بعدين هبقى اقول، وده اللي حصل.. لكني محكيتش اي حاجة، انا بخاف وهو هددني، انا شوفت بعيني اللي عمله مع اختي، اومال هيعمل فيَّ ايه لو بلغت عنه؟!.

عارفين.. أصعب إحساس ممكن الواحد يمر بيه، هو الشعور بالعجز..

إنك شايف أقرب الناس ليك بيتأذي وأنت واقف قدامه مش عارف تقدم له أي مساعدة..

من ساعتها واختي في المستشفى، مش عارف اروح لها علشان ميسألونيش، وفي نفس الوقت عايز اروح اطمن على اختي.

بعترف اني واحد ضعيف مالوش اي شخصية، بس غضب عني مش بإيدي، كل اللي حصلنا ده سببه طلاق أبويا وأمي..

واللي دفعنا تمنه.. أنا وأختي.

تمت..

#قصص_إجتماعية_م_إ